ازاى تكونى حازمة بدون زعيق؟ - مجلة الشفق - ?How to be Firm without yelling

 ازاى تكونى حازمة بدون زعيق؟  - مجلة الشفق  - ?How to be Firm without yelling

ازاى تكونى حازمة بدون زعيق؟How to be Firm without yelling

اية الفرق ما بين العصبية و الزعيق و السيطرة على الطفل و ما بين الحزم ؟؟؟

للاسف فى ناس كتير مفهوم التربية الحديثة او الإيجابية هى ان الأم تكون متساهلة مع الطفل و تعمل كل اللى هو عايزه ..و دة اصلا بيوجد شعور دائم عند الام بالتقصير و تحاول ترضى اولادها بأى شكل لدرجة انها بتضحى بكل وقتها و صحتها و حياتها علشان ترضى و تدلع الأولاد ..

بس تعرفى ان المفهوم دة خاطئ تماما !!!

الأم اللى بتعمل كل اللى الطفل عايزه و تدلع و تطبطب علطول و ما بتحطش قواعد و لا عندها حزم بتريى طفل ضعيف جدا جدا نفسيا ؟؟؟

ليه ؟

لان الطفل لما يكبر و يواجه الحياة و الناس و سوق العمل الطفل دة مش هيلاقى اللى يطبطب عليه و يعمله اللى عايزه و هيكون انسان بيدور على اللى يلبى له طلباته من غير ما يشتغل و لا يعمل اى حاجة فى الحياة و ممكن طبعا بسهولة جدا يمسى ورا اصدقاء السوء لانه طريق سهل و مغرى بدون ما يفكر فى العواقب و لا فى النهايات

طيب اية بقى ؟؟؟

تعملى اية ؟

ما هو انتى ماما اللى لازم تطبطب و تدلع برضه بس فى نفس الوقت تكون حازمة بدون عصبية

الصراحة هو فى فرق كبير ما بين الحزم و العصبية ...

الحزم والقواعد شئ مهم جدا جدا فى التربية و الطفل فعلا فى وجود الحزم بيكون طفل سوي نفسيا

المعضلة بتكون ازاى تكونى حازمة و فى نفس الوقت حنينة و مش عصبية ؟؟؟

تعالى أقولك ازاى ..
1- الثبات
2- قولى هتعملى اية و اعمليه فعلا
3- حطى قواعد واضحة جدا
4- الإتفاقات و الاحترام المتبادل
5- الحب بدون شروط

تعالى نمسك طريقة طريقة فى سلسة مقالات ..

اول طريقة انك لما تقولى لإبنك تفضلى ثابتة على رأيك بهدوووءءءءءءء

مثلا ..

ماما مامى ..عايز شيكولاتة

الأم: مش هينفع دلوقتى يا روحى علشان انت لسة واكل واحدة

الطفل: مامى انا عايز دلوقتى و يفتح عياط

الأم: انا بحبك جدا و خايفة عليك و مش هينفع دلوقتى سكريات

الطفل هيزن و يعيط و يحاول مهما يحاول ..
كل اللى الأم محتاجة تعمله انها تكون هادية و تفضل ثابتة على موقفها

لانها لو تراجعت و كل شوية ابنها ممكن يقول لها انا عايز و انا بحبك و ممكن كمان يستنزف مشاعرها و يضغط عليها بالزن و الإصرار

لو الأم تنازلت و وافقت على حاجة هى قالت عليها لأ ..
ساعتها الطفل بيتكون عنده عضلة المقاومة المستميتة

يعنى اية ؟؟

يعنى انهاردة زن خمس دقايق لحد ماما غيرت رايها
بكرة هيزن لمدة عشر دقايق لحد ماما تغيير رايها و هكذا ...

لحد ما الأم توصل من كتر الزن الى العصبية و الزعيق اللى مش بيجيب اى نتيجة حلوة

يبقى الحل خليكى ثابتة على موقفك بهدوء و تقبلى ان الطفل لازم يزن و عضلة المقاومة عنده انتى اللى ممكن تقويها لما تتنزلى عن رايك علشان الزن

ثانى طريقة هى انك تقولى هتعملى اية و تعمليه فعلا

مثال : انتى عارفة ان اولاد بيتخانقوا مثلا فى السيارة

و كل ما انتى سايقة تلاقى خناق و زعيق

يبقى علشان الموقف ما يتكررش بمنتهى الهدوء قولى لهم قبل ما يركبوا

لو حصل خناق هركن على جنب و انزل بره السيارة و استنى توقفوا الخناق و تقولوا خلاص يا ماما

و فعلا بجد لما يبدوا يتخانقوا ..اعملى اللى قلتى عليه من غير تهديد
من غير ما تقولى انا هقف لو ما سكتوش و تهددى بالكلام و فى الأخر تتعصبى
بالعكس ..اركنى و انزلى اقفى جنب السيارة بدون ما تفتحى بقك و لا تنطقى .. و تخيلى رد فعل الأولاد اية لانهم فعلا هيثقوا فيكى أكتر لانك بتنفذى كل اللى بتقولى عليه بإحترام و بدون عصبية

طبعا عارفة كل الكلام اللى بيدور فى دماغك زى دة صعب او مش هينفع او ..او .. بس صدقينى التجربة خير دليل

((( بعض اساليب التربية السليمة ))))

○ ابتسم عند رؤية ابنائك أو حتى احضنهم

(ده بيشعرهم بالسعاده والأمان)

○ عامل طفلك باحترام 

(يعنى نستخدم لو سمحت لما تطلب منهم حاجه مش يبقى أمر مباشر... لاتكذب عليهم ... لما توعدهم بحاجه تنفذها ...)

○ استمتع بصحبة ابنائك 

(يعنى لما تقضى وقت مع أولادك حاول تسمعهم وانت مهتم حتى لو كلامهم طفولى ... حاول تلعب معاهم وانت مبسوط ... ده بيعطى شعور بالراحه والاسترخاء للأبوين نفسهم)

○ النظام والنظافة ليستا على قدر الأهمية التى تتخيلها ( طبعا الحرص عليهم هام لكن ده لايمنع انك تسيب اولادك يلعبوا ويبهدلوا شويه وبعدين ينظموا )

○ لابد من السماح للأطفال بتعلم دروسهم بانفسهم وان يرتكبوا اخطاءا 

( إن لم يخاطروا لن يتعلموا ... ومن لم يرتكب الخطأ لا يحقق انجازا ...ببساطه سيبه يتعلم من غلطه فى حدود المعقول والامان)

○ لا تنقل قلقك لابنك 

( يعنى احتفظ بمخاوفك وقلقلك لنفسك ... يعنى لما تبقى خايف عليهم من المدرسه .... قلقان من امتحاناتهم .... خايف يتعدوا او يتعبوا .... بلاش تنقل لاولادك القلق النفسى ده ... احكى لحد كبير تانى لو مش قادر樂 ... بلاش الأطفال ... بالعكس لازم تديهم ثقه لكل حاجه هيعملوها بنفسهم)

○ دع أبنائك يعتمدون على أنفسهم 

(لا تفعل لطفلك أى شئ يستطيع أن يفعله بنفسه..... بداية من أنه يلبس نفسه ... يأكل نفسه ....يساوى اوضته .... يذاكر دروسه ... وهكذا على حسب العمر .... وأهم مهارتين نحرص على تعليمهم بدرى ازاى يقدر ينفق ويتحكم فى فلوسه ويتخذ قراراته بنفسه )

○ اثن على ابنائك بحكمة 

(تشجيع الاطفال لما يعملوا حاجه كويسه شئ هام جدا ... لكن مانبالغش فى التشجيع على الحاجات البسيطه اوى .... كمان بلاش نتقتصر التشجيع على الانجاز الدراسى فقط ... لكن كمان لازم نثنى على سلوك الطفل المهذب دايما )